ភ្នំពេញ៖ មហាសន្និបាតវិស័យយុត្តិធម៌សម្រេចឲ្យមានមន្ត្រីទទួលបន្ទុកបញ្ជូនសេចក្តីសម្រេចរបស់តុលាការ ការធ្វើបែបនេះគឺដើម្បីដោះស្រាយបញ្ហាប្រឈម និងធានាប្រសិទ្ធភាពនៃការជូនដំណឹង និងការបញ្ជូនសេចក្តីសម្រេចរបស់តុលាការ។
បើតាមខ្លឹមសារនៃសេចក្តីប្រកាសព័ត៌មានស្តីពី លទ្ធផលមហាសន្និបាតបូកសរុបលទ្ធផលការងារវិស័យយុត្តិធម៌ទូទាំងប្រទេសឆ្នាំ២០២៣ និងកំណត់ទិសដៅការងារជាអាទិភាពបន្តចុះថ្ងៃទី២៩ ខែមីនា ឆ្នាំ២០២៤ មន្ត្រីទទួលបន្ទុកប្រតិបត្តិការបញ្ជូន ដែលទទួលប្រតិភូកម្មអំណាចពីអាជ្ញាសាលា ឬក្រឡាបញ្ជី ហើយមន្ត្រីនេះត្រូវស្ថិតក្រោម ការទទួលខុសត្រូវរួមរបស់ប្រធានសាលាជម្រះក្តី។
បើតាមការសម្រេចនេះ ក្រសួងយុត្តិធម៌ក៏ត្រូវពង្រឹង និងលើកកម្ពស់កិច្ចសហប្រតិបត្តិការជាមួយក្រសួងប្រៃសណីយ៍ និងទូរគមនាគមន៍ ជាពិសេសការពិភាក្សាររៀបចំយន្តការរួមមួយដើម្បីលើកកម្ពស់ប្រសិទ្ធភាពនៃក្នុងការអនុវត្តកិច្ចការបញ្ជូនឱ្យបានឆាប់រហ័ស និងឱ្យបានត្រឹមត្រូវតាមការកំណត់ របស់ច្បាប់ជាធរមានផងដែរ។
ក្នុងសេចក្ដីប្រកាសបានបញ្ជាក់បន្ថែមថា៖ «ការធ្វើវិសោធនកម្មក្រមនីតិវិធីរដ្ឋប្បវេណី នឹងត្រូវបញ្ចូលបន្ថែមនូវរបៀបនៃការបញ្ជូន ដោយប្រើប្រាស់បច្ចេកវិទ្យាឌីជីថល ឬប្រព័ន្ធទំនាក់ទំនងសង្គម ដែលធានាបាននូវប្រសិទ្ធភាព ភាពឆាប់រហ័ស និងកាត់បន្ថយការចំណាយថវិកាលើកិច្ចការបញ្ជូននេះ»។
គួរឲ្យដឹងផងដែរថាការបញ្ជូនសេចក្តីសម្រេចរបស់តុលាការពីមុនជាតួនាទីរបស់ក្រឡាបញ្ជី និងអាជ្ញាសាលា តែបញ្ហានោះគឺអ្នកទាំងពីរមានការងារច្រើនដែលប៉ះពាល់ដល់ការងារក្នុងការបញ្ជូនសេចក្តីសម្រេចកន្លងទៅ៕
